أشعار عامية

عربجي مؤهلات عليا

شمحوت جايب لزبون مية طوبة علي متر رمل
في عز الشتاء والعوصة والوحل
والدنيا عتمة كحل
وكل شوية العربية تغرز ينزل يزق
وعيشة غلب
وأنا جي من البلد بأقولة بعد السلام والتحية
إية اللي رماك علي المر ؟
قاللي الأمر
قلتلة العيب في الفقر ؟
قاللي الفقر عمرة ما كان عيب
وزي ما فية ناس فقيرة في ناس غنية
وزي ما فية ناس بشوات فية عربجية
المشكلة مش فيا
المشكلة في إبني
اللي حني ظهري لحد ما خد الكلية
هايلف يلف ومش هايلاقي غير الحمار
والعربية
ضحكت وقلتلة هو عربجي شوية
قاللي هوة فية حد مغروز في الطين
علشان جوز جينهات إلا العربجية
هوة فية حد كل راس مالة حمار وعربية
قلتلة ياعم شمحوت ربنا يهون عليك وعليا